Euskal osasun-agintaritzek jakinarazi dute esne gordinarekin egindako gazta helduaren zenbait lote erretiratuko dituztela, Buruaga Arditegia enpresakoak (1501584-VI osasun-marka dutenak), listeriaren eta toxina estafilokozikoaren ondoriozko kutsadura mikrobiologikoa dela eta.
Trazabilitate-sistemei esker, lote kaltetu guztiak identifikatu dituzte eta merkatutik kentzen ari dira. Gazta horiek EAEn, Nafarroan, Katalunian, Valentzian, Gaztela eta Leonen eta Madrilen banatu ziren.
Alerta hori Informazioa Bizkor Trukatzeko Sistema Koordinatuaren bidez (SCIRI) jakinarazi da, autonomia-erkidegoek dagozkien neurriak har ditzaten.
Horrez gain, herritarrei azaldu zaie produktu horiek erosi baldin badituzte ez dituztela jan behar, edo osasun-zentroren batera jo behar dutela baldin eta kontsumitu badituzte eta sintomaren bat badute (oro har, digestio-koadroak).
Osasun Saileko Elikagai Segurtasunaren ikuskatzaileek egiten dituzten ohiko kontrolei esker detektatu da alerta hau, ustez gazta hori kontsumitzeagatik elikadura-intoxikazio arina izan duten bi pertsona ikertu ondoren.
Nola bermatzen da Elikagaien Segurtasuna?
Elikagai-enpresek fabrikazio-praktika egokiak eta prebentzio- eta kontrol-sistemak dituzte elikadura-arriskuak aurkitzeko eta saihesteko, autokontrolerako planetan oinarrituak eta osasun-agintaritzek baliozkotuak. Administrazioak, kontrol ofizialaren bidez, egiaztatzen du elikagai-enpresek betetzen dituztela beren ekoizpenen segurtasuna bermatzeko eskakizunak.
Alabaina, eta zero arriskua existitzen ez denez, batzuetan gerta daiteke prebentzio-sistemek huts egitea eta arriskuren bat elikakatean sartzea. Horrelakoetan, martxan jartzen dira detekzio-sistema bizkorrak, produktuak erretiratzeko planak eta alerta-sareen jakinarazpenak.
Trazabilitateari esker, elikagai baten arrastoari jarrai dakioke hasi jatorritik eta azken salmenta-punturaino, eta laster lokaliza daitezke elikagai kaltetu guztiak, merkatutik erretiratu ahal izateko.
Alerta-sareen bitartez, alderdi kaltetu guztiei bizkor ohartarazi ahal zaie elikadura-arriskuez, arriskuak detektatzean ahalik eta azkarrena erreakziona dezaten. Era berean, alerta-sareak funtsezko tresna bat dira informazioaren fluxua bermatzeko eta alerta-kasuetan kudeaketa eta komunikazioa errazteko.
Eguneraketa data: 2025/07/18