Sendagaien Europako Agentziak (EMA) Europako abeltzaintzan antibiotikoen kontsumoari buruzko 13. ESVAC txostena argitaratu berri du.
Txostenak ondorio nagusitzat nabarmentzen du albaitaritzako antibiotikoen salmentak % 53 murriztu zirela 2011 eta 2022 artean; inoiz jasotako maila baxuena da, 25 herrialdetako datuen arabera. Horrek esan nahi du antimikrobianoen kontsumoa funtsean murriztu dela Abeltzaintzako Antimikrobianoen Kontsumoa Zaintzeko Europako Proiektuaren (ESVAC) parte diren Europako 31 herrialdeetan.
Halaber, giza medikuntzan abeltzaintzan erabiltzeko garrantzi kritikoa dutela iritzitako antibiotiko-moten salmentak nabarmen murriztu zirela azpimarratu behar da.
- Hirugarren eta laugarren belaunaldiko zefalosporinak % 49 jaitsi ziren.
- Polimixinak % 81.
- Fluorokinolonak % 25.
- Beste kinolona batzuk % 90.
Antibiotiko guztiak zuhurtziaz eta erantzukizunez erabili behar badira ere eraginkortasuna gal ez dezaten, bereziki garrantzitsua da antibiotiko horiek osasun publikorako arrisku potentziala arintzea, Antimikrobianoei buruzko Aholkularitzarako ad hoc Aditu Taldearen (AMEG) kategorizazioan adierazten den moduan.
Dokumentu horrek Europako Batzordearen «Baserritik mahaira» Estrategian ezarritako helburuak betetzeko egindako aurrerapenei buruzko informazioa jasotzen du, EBko abeltegiko animalietarako eta akuikulturarako antimikrobianoen salmentaren murrizketari dagokionez. Izan ere, EMA Europako albaitaritzako antimikrobianoen salmentak biltzen ari da 2009az geroztik, ESVAC proiektuaren bidez.
2022an, EBko 27 estatu kideek 2030erako ezarritako % 50eko murrizketaren helburuaren erdia baino apur bat gehiago lortu dute, 2018arekin alderatuta; horrek erakusten du herrialdeak estrategiaren helburuak betetzeko bide onetik doazela.
Horrela, ekimen politikoei forma eman, egungo neurrien eragina ebaluatu eta antimikrobianoekiko erresistentzia agertzearen aurrean laguntzeko helburuak ezar daitezke.
Eguneraketa data: 2025/08/18