Eusko Jaurlaritzaren Bizkaiko Osasun Publikoaren Zuzendariordetzak eginiko Zaintza Epidemiologikoaren Memorian daude laburtuta 2019an eta 2020an Bizkaian deklaratutako gaixotasun nagusiak. Horien artean, hauek nabarmendu nahi ditugu:
Elikagaien bidezko toxiinfekzioak
Guztira, Campylobacter bakteriaren ondoriozko 968 infekzio (84,70/100.000) deklaratu ziren 2019an eta 1.022 (88,94/100.000) 2020an. Kasuen % 31 bost urtetik beherakoen artean gertatu ziren.
Hamar listeriosi-kasu (0,87/100.000) deklaratu ziren 2019an. Kaltetuen batez besteko adina 74 urtekoa izan zen eta hilkortasun-tasa % 10ekoa.
Norobirusaren 322 isolamendu (28,23/100.000) kontabilizatu ziren, eta horietatik % 55 hamar urtetik beherakoen artean gertatu ziren. Kasuen erdia baino gehiago (% 55) urrian eta azaroan gertatu ziren. 2020an, berriz, 138 kasu (12,01/100.000) deklaratu ziren.
Salmonellosiari dagokionez, 260 kasu (22,75/100.000) erregistratu ziren 2019an eta 179 kasu (15,58/100.000) 2020an. Aurreko urteekin alderatuta, beheranzko joerari eutsi zaio. Kasuen % 32 hamar urtetik beherakoen artean antzeman ziren. Andui gehienak (% 44) S. thyphimurium izan ziren, eta horien atzetik S. enteritidis (% 25).
Elikagaien bidezko toxiinfekzioen agerraldiak
2019an, elikagaien bidezko edo pertsona batetik bestera transmititutako toxiinfekzioen 26 agerraldi ikertu ziren. Horiek, guztira, 585 pertsonari eragin zieten. 2020an, berriz, hamar agerraldi ikertu ziren (ehun pertsonari eragin zieten). 10 kasu horietatik, 3 etxebizitza partikularretan gertatu ziren. Kasu horietako batean 21 pertsona kaltetu ziren partikular batek prestatutako menu bat kontsumitzeagatik. Salmonellak eragin zituen toxiinfekzio horiek bi kasutan.
Transmisio zoonotikoko gaixotasunak
2019an, Q sukarraren 41 kasu (tasa: 3,59/100.000) erregistratu ziren. Familia-agerraldi bat gertatu zen (hiru kasu), eta beste hamar kasu EAEtik kanpoko nekazaritza-turismoko establezimendu batean egindako egonaldiarekin lotuta egon ziren.
Eguneraketa data: 2025/07/21