Frantziako Nekazaritza Ministerioak ohar bat argitaratu du duela gutxi, eta horren bidez jakinarazi du oso patogenoa den hegazti-gripearen 61 foku detektatu direla, nagusiki eskortako hegaztien abeltegietan. Horietatik 48 Landetan daude.
Europako beste zenbait herrialde bezala, Frantzia oso patogenoa den hegazti-gripeari aurre egiten ari da azaroaren erdialdetik. Egoera epidemiologikoa okerrera egiten ari da herrialde osoan, baina batez ere Landetan. Bertan, Frantziako hegazti-gripearentzako erreferentziazko laborategi nazionalak (ANSES) oso patogenoa den H5N8 hegazti-gripearen foku bat baieztatu zuen gizentzeko 6.000 ahate zituen Landetako ustiategi batean.
Abenduaren 17an, Frantzia osoa arrisku-maila altuan sartu zen, eta frantziar agintariek babes-neurri hauek hartu zituzten, gaixotasuna zabaltzea saihesteko:
- kaltetutako hegaztiak hiltzea
- ustiategiak garbitzea eta desinfektatzea
- babes-guneetan eskortako hegaztien mugimendua debekatzea
- fokuen inguruak zaintzea
- biosegurtasun-neurri indartuak hartzea abeltegietan eta animaliak garraiatzean
Landetan kasuek oso azkar egin dutenez gora, eta ANSESen gomendioei jarraituz, Frantziako Gobernua prebentziozko hilketak ere ari da egiten. Hilketa horiek 1 km-ko erradioan ari dira egiten kaltetuak izan daitezkeen espezieak dituzten ustiategietan, eta, palmipedo guztien eta konfinatuta ez dauden eskortako beste hegazti-espezie batzuen kasuan, 3 km-ko erradioan.
Halaber, MAPAk beste informazio-ohar bat argitaratu du bere webgunean, eta, bertan, ADNSri jakinarazitako fokuen datuak ere eguneratu ditu. Joan den abenduaren 9tik gaur arte, IAAPen 246 foku jakinarazi dira guztira, gehienbat H5N8 azpimotakoak, honako banaketa honekin:
Eguneraketa data: 2025/08/19