EFSAK eman duen iritzi zientifiko baten arabera, manganesoaren ahorakin-maila segurua 8 mg‑koa da egunean helduentzat, eta 2 eta 7 mg artekoa egunean beste populazio-talde batzuentzat. Erreferentzia-maila horiek osagai horren neurotoxikotasunean oinarritzen dira.
EFSAren Nutrizio, Elikagai Berri eta Elikagai Alergenoen Panelak (NDA) literaturaren berrikusketa sistematikoa egin du, manganeso-ahorakinei buruzko ebidentzia ebaluatzeko, manganeso-gatz baimenduak barne, baita osasunerako eragin negatiboak ere, aintzat hartuta pertsona eta animaliei buruzko datuak.
Erreferentzia-mailak
Egungo azterlanen arabera, neurotoxikotasuna ondorio kritiko bat da, baina datuak ez dira ez nahikoak eta ez egokiak dosia-erantzuna harremana ezaugarritzeko eta manganesoak eragindako neurotoxikotasunari buruzko erreferentzia-puntu bat identifikatzeko.
Beraz, Panelak manganeso ahorakin-maila seguruak finkatu ditu populazioa orokorreko kontsumitzaile handien oinarrizko manganeso-ahorakin behatuetan oinarrituta (95. pertzentila). Honako hauek dira populazioaren adin-tarteetarako ezarritako maila seguruak:
- 4 hilabete eta urtebete artean: 2 mg egunean
- 1 eta 3 urte artean: 4 mg egunean
- 3 eta 7 urte artean: 5 mg egunean
- 7 eta 14 urte artean: 6 mg egunean
- 14 eta 18 urte artean: 7 mg egunean
- 18 urtetik gora (haurdun eta edoskitze-aldian dauden emakumeak barne): 8 mg/kg
Panelaren arabera, ahorakin-maila seguru horiek aplikatzen zaizkio iturri dietetiko guztien manganeso-ahorakin osoari, elikagai aberastuak eta elikadura-osagaiak barne.
Ikerketa-beharrak
Iritzian honako ikerketa-hutsune eta -beharrak identifikatzen dira:
- Esposizio- eta eragin-biomarkagailuak falta dira dietan manganesoaren arriskuen ebaluazioan erabili ahal izateko.
- Manganesoaren ahorakin dietetiko osoaren eta funtzio neurologikoen gaineko eragin negatiboen arteko lotura ikertzeko azterlan gehiago behar dira, bereziki garapen-fasean eta esposizio dietetiko handia dutenen artean.
- Manganesoak toxikotasunarekiko duen berariazko sentikortasunari buruzko ikerketa gehiago.
- Manganesoaren forma dietetikoen toxikotasun-profileko desberdintasunei buruzko ikerketa gehigarriak.
- Manganesoaren balizko toxikotasunari buruzko ikerketa gehiago, beste balorazio-irizpide batzuekin, neurotoxikotasunaz gain.
- Manganeso-ahorakinei buruzko datu gehiago sortzea, elikadura-osagarrietatik eta elikagai sendotu nahiz aberastuetatik abiatuta, manganeso-ahorakinak ebaluatu eta arriskua ezaugarritu ahal izateko.
Eguneraketa data: 2025/07/18