Elikadura-gehigarri bat baimentzeko segurtasuna ebaluatu behar da, eta hori Elikagaien Segurtasuneko Europako Agentziak (EFSA) egiten du. Elikadura-gehigarri guztiak etengabe ber(ebaluatzen) ditu EFSAk, baimenduen zerrendako gehigarri guztien segurtasuna bermatzeko xedearekin. Berrebaluazio horren barruan, aldaketak egiten dituzte elikadura-gehigarriei eragiten dien legedian.
Argitaratu berri dituzten bi araudik berrikuntzak ekarri dituzte gehigarrien arloan, bereziki bularreko haur eta haur txikientzako elikagaien eta erabilera mediko berezietarako elikagaien erabileran: (EB) 2026/196 Erregelamendua eta (EB) 2026/189 Erregelamendua.
(EB) 2026/196 Erregelamenduak jorratutako gehigarriak maiz erabiltzen dira elikadura‑industrian, lodigarri, egonkortzaile edo testura-agente gisa, eta honako hauek dira:
- Karragenanoak (E 407)
- Algarrobo-goma (E 410)
- Guar-goma (E 412)
- Goma arabigoa (E 414)
- Xantano goma (E 415)
- Pektinak (E 440 i eta ii)
- Almidoizko oktenilsukzinato sodikoa (E 1450)
Aldaketek erabilera-baldintzei, zehaztapen teknikoei eta irizpide mikrobiologikoei eragiten diete. Aldaketa esanguratsuenetako bat da guar-gomaren (E 412) baimena pixkanaka kentzea bularreko haurrentzako prestakinetan eta bularreko haurrentzako erabilera mediko berezietarako elikagaietan, 2027ko apirilaren 27ra arte.
Gainera, definizio batzuk aldatzea proposatu dute, eta berunaren, artsenikoaren, merkurioaren eta kadmioaren gehieneko mugak murriztu dira gehigarri askotan.
Erregelamenduak derrigorrezko irizpide mikrobiologiko hauek gehitu ditu:
- Zenbaketa osoa plakan
- Legamiak eta lizunak
- Ez egotea Salmonella spp.
- Ez egotea Cronobacter spp. bularreko haurrentzako elikagaietarako gehigarrietan.
Onetsitako neurriak aplikagarriak izango dira 2026ko abuztuaren 18tik aurrera, hainbat trantsizio-aldirekin, sektorea errazago egokitzeko.
- 2026ko abuztuaren 18a baino lehen legalki merkaturatutako gehigarri eta elikagaiak merkaturatzen jarraitu ahal izango dira izakinak agortu arte edo lehentasunezko kontsumo-datara arte.
- Almidoizko oktenilsukzinato sodikoaren (E 1450) kasuan, trantsizio-aldia luzatu egingo da 2028ko otsailaren 18ra arte.
- Guar-gomaren (E 412) erabilera kentzeko, epe espezifikoak aurreikusi dira 2027ko apirilera arte.
(EB) 2026/189 Erregelamenduak goma lakaren (E 904) erabilera baimentzen du estaltzeko agente gisa erabilera mediko berezietarako elikagaietan (konprimatu eta gragea gisa), eta haren zehaztapenak eguneratu ditu.
Eguneraketa data: 2026/03/12